Jetzt bini uem Weg
am Mentig 14. 5. am 17:30 starte ich und grad zerscht verabschiede ich mi vo de Nochpuure und de Therese. En chorze Bsuech uf de Poscht, i ha no Briefe wo weg müend. Hei Brigitte i ha deer s'Porto nöd zalt, i bringes denn i 3 Johr denksch denn dra gäll. Im Lindehof schlof i nomol i gwohnter Umgäbig und denn heissts Abschied neh und los gohts.
Bi schönem Wetter wandere ich uf Ebnat-Kappel wo ich de Gottesdienst bsueche. Sehr iidrücklech wie de Thomas ( Pfarrer ) uf min Weg ii goht, mich verabschiedet und segnet. Jetzt hani au min Pilgerpass mit de erste Stämpel übercho. Z'Wattwil treff ich denn uf de Jakobsweg und jetzt fühle ich mich au wörkli als Pilger. Schwär gohts obsi i d'Laad wos denn ä chlini Pause imä Pilgerstöbli giit. Ä herrlechi Ussicht isch dä Lohn för dä strengi Uffstieg, däför werded d'Wolkä immer dunkler.

en letschte Blick uf d'Churfirschte

In St. Gallenkappel chani denn au de Regeschutz usprobiere. Am guet 5i bini a mim Etappeziel im Rietstuck in Eschenbach. Ä herzlechi Ufnahm bi Chläre und Max und en guete Schlof stärchede mi för mini Wiiterreis.
Am Morge denn Räge und Wind aber wiiter gohts Richtig Rapperswil. Am Mittag bini denn döt und freu mi uf diä gratis Suppe wos lut Pilgerfüärer im Hotel St. Jakob git. Notürli isch hüt Wirtesonntig, schad öppis warms het mer guet tue. Alles nass und chalt, im Etzel obe schneits, und trotzdem sind no 3-4 Stond Wäg vor mer. Ich mag nümme, wenn ich aber am Fritig will im Fusterli si, muess i wiiter. Ich breche min Pilgervorsatz und nimm de Zog vo Pfäffikon bis Einsiedeln. Da tuet dä Füäss guet, aber mis Gwössä tuets nöd wörkli beruige. Villicht helft denn es Vaterunser in Einsiedle wiiter. Schö bini jetzt in Einsiedle und cha mi erhole. Am Obig dörf ich en wunderschöne Pilgergottesdienst mitfiire und da beruhigt, het doch de Pater i de Predigt gsait dass nöd jede Weg ä so verlauft wiänen mer vorusplaned. Wohr isch es.

en herrliche Morge direkt vom Zimmerfenster use

Uffahrtdonnstig wunderbar isch dä Morgä, fit und zwäg gohts los Richtig Haggenegg em höchste Punkt vom Schwizer Jakobsweg. Vo Alptal gohts sehr steil ufe und do chunts us, dass mini Bei zwenig dra hend, dä Buuch däför viel zviel und dä Rucksack au no viel z'schwär isch. Ich liide, aber da söll jo au ächli ä so sii. Obe a cho isch wieder ä herrlechi Usssicht und denn gohts 1000 Meter steil bergab uf Schwyz. Ich gseh, dass ich bis am Fritig nöd bis is Fusterli chume, so mache ich de 2ti Bruch und chauf es Billet vo Schwyz uf Arth-Goldau.
Im Rössli hani öbernachtet und denn gohts guet und fröhlech uf mini letschti Etappe bevors ä paar Tag Pause git. Am Zugersee entlang chumi ganz guet vorwärts und au dä Ufstieg is Fusterli goht sehr guet. I glaube da isch d'Vorfreud wo mi trebe het. Scho chorz nochem drüü bini dobe und werde sehr herzlech empfange.
Am Samstig gohts mit liechtem Rucksack abe uf Root zum Schwiegermammi is Altersheim. Mit emene grosse Umweg chumi am Mittag in Inwil a wo ich en Bsuech i de alte Wiihandlig mim erste Wohnort nochem Hochzig mache. Z Inwil treffe ich au d'Nadine und Famili zum Picknick. Jetzt läärt sich min Rucksack, chani doch einiges, öberflüssigs ere mit hei geh. Jetzt gohts öber de Berg uf Dietwil wo ich zum Hochziitsappero vom Chregi und de Corinne iiglade bi. Denn gilts Abschied neh vo allne Bekannte und vor allem vo de Nadine und de ganze Famili. Tamara hät ganz gross gsait, also i 3 Johr wieder   Supper !!!

Do het mer Ziit för sini Gedanke

Mit vielne schwäre Gedanke wandere ich nomol zweiehalb Stond ufe is Fusterli. Döt fiiret de Andreas grad sin 30igschte und so sitze ich au nochli here und lösche mine Dorscht.
Am Sonntig hends viel Arbet im Fusterli, lieget doch öppe 8ha Heu am Bode und uf dä Obig isch Räge a gsait. Mi chamer nöd bruche d'Maschiene mached alles und diä chani nöd bedienä. Äs lüütet a de Huustör und inne chämed d'Edith und dä Beat, hei Vreni diä Öberraschig isch deer glungä.Nocheme guete Kaffi Luz mached mer en Spaziergang in Bode ufe zom luege wie sie tünd s'Heu zäme neh. Do stoht denn au plötzli dAstrid no do obe und bringt mer da versprochene Badtuech, herzleche Dank Astrid. Sie stuhned öber diä Ussicht, ninnt no es Kaffi und Torte und zieht den witer. Bimene feine Raclette goht dä Sonntig zend und well däWätterbricht nöd ä so guet isch blieb ich nochli im Fusterli. So hani Ziit und Glägeheit z'schriibe d'Vreni macht för mi Wösch damit i nochher wieder suber vo do weggange.

Bis zum nächsten Mal mit Pilgergruss  Ultreia  Pilger Johann